Prei sekolah aku lan keluargaku mudik menyang Ponorogo. Aku ing Ponorogo mung 3 dina soale uwis kepepet karo melbu sekolah. Aku lunga budhal tanggal 29 Desember lan mulih tanggal 31 Desember wayah isuk. Pas wes teko Mbalong, aku karo bapakku arepe tuku sego gule karo sate, tapi bakule tutup soale enek konvoi arepe neng stasiun Ponorogo. Dalane rame tapi akeh polisi digawe njagani konvoi e kui. Ternyata pas aku neng Ponorogo kancaku sak kelas ya neng Ponorogo, neng omahe mbae. Wonge ya cerita lek neng sekitar kono ya akeh sing arepe konvoi.

Aku neng Ponorogo mung ing omahe mbah putri lan menyang kali karo sedulur-sedulurku, soale arepe metu uwis kesel. Kaline apik lan resik banyune biru, lan akeh wong mancing nek kono, rata-rata sing mancing mung entok iwak wader sing cilik-cilik. Ing kali ya enek bekas ntom-ntom, yaiku lemah lempung sing digawe uncal-uncalan bocah cilik pas dolan ing kali. Neng kono enek seng nyebrang kali numpak montor tapi ora nganggo jembatan. Aku karo bapakku gentenan nyekel pancinge soale aku pengen jajal mancing, tapi aku ora oleh-oleh iwak. Tapi bar kui dulurku oleh iwak wader, aku mlayu nek pinggire kali terus aku kepleset klambiku maleh suek.

"Dikandani ojo playonan ae mengko tibo, ati-ati lek mlangkah akeh becekan." jerene bapakku.

Terus bar kui aku mulih soale arepe salen bene ora kembloh, disusul karo dulurku muleh karo nggowo iwak wader 2 sing cilik diadahi plastik bening sak temune neng kali. Jarene ora arepe dipangan tapi diingu neng kamar mandi.

"Tak ingu ae eman-eman lo lek digoreng, lek diingu kan iso ngantek gede lagi digoreng mantap." dulurku omonge karo cekikian

Pas wayah bengi aku metu kanggo tuku jajan karo dulur-dulurku wayah bengi bene enek jajan pas wayah arepe ndelok tv bengi-bengi. Sesuk e aku karo bapakku neng pasar soale enek pasaran pas wayah dina legi karo marani mbah putri neng tokone, mbahku dodolan buah, aneka jajan, karo kembang digawe ziarah kubur. Aku neng pasar tuku es caon, es dawet, jajan, cenil, gethuk, lan jajanan pasar liane. Bar kui mulih terus ora enek kegiatan liane mung dolanan hp karo ndelok tv. Ora nyadar pas arepe dolan ing omahe tangga aku keturon nganti jam 4 sore, soale paketanku entek wayah kui.

Sesuk e pas wayah isuk aku karo bapakku arepe mulih, tapi sak durunge mulih aku golek sarapan sek neng kono bene ora lemes pas perjalanan. Aku sarapan sega pecel langganan e bapakku pas mulih ing Ponorogo, bakule tangga dewe dadi penak lek tuku gari mlaku. Aku terus subuhan, soale aku lek tuku sarapan jam setengah 5, terus dipangan neng kono. Bar subuhan aku adus terus cepak-cepak digawe mulih ing Tulungagung. Aku mulih sekitar jam setengah 6 isuk bene ora kudanan karo kawanen mbahku nggawani jagung digawe bakar-bakar. Pas ning gunung kabut e kuandel nganti ora iso ndelok kendaraan ning sebrange, semremet gara-gara ora ketok apa-apa. Terus pas wayah teka ing Tulungagung aku karo bapakku mandek ing Kalangbret digawe leren, aku Ning kono tuku ombe soale ngelak. Aku teka ing Tulungagung jam 7.30, mung nempuh perjalanan 2 jam. Pas aku teka omah aku langsung gletak soale kekeselen terus aku keturon nganti jam 10, bar ngunu aku mangan jajan sing digawane mbahku.